Beda Historia Ecclesiastica Gentis Anglorum Book 2, chap. 15

Beda Historia Ecclesiastica Gentis Anglorum Book 2, chap. 15, but chap. 12 in the Old English awending   made in the days of King Ælfred :

 Hæfde Edwine se cyning swa micle wilsumnesse þæs bigonges Cristes geleafan, þæt he eac swylce Eorpwald Eastengla cyning Rædwaldes sunu to þon gespeon, þæt he forlet þa idelnesse deofolgilda 7 þæm gerynum onfeng Cristes geleafan mid his mægðe Eastenglum. Wæs Rædwald his fæder geo geara in Cent gelæred in þa gerynu Cristes geleafan, ac holinga; forðon þa he eft ham com, wæs biswicen from his wife 7 from sumum unrihtum lareowum, þæt he forlet þa hluttornesse Cristes geleafan. 7 his þa neorran tide wæron wyrson þam ærran, swa þætte þy þeawe þe geo þa ealdan Samaritane dydon, þæt he wæs gesewen Criste þeowian 7 eac deofolgeldum ; ond he in þam ilcan herige wigbed hæfde to Cristes onsægdnesse 7 oðer to deofla onsægdnisse. Se ilca here [for herge ?] þær wunade oð Aldwulfes tide þære ilcan mægðe cyninges; sægde he þæt he hine cneoht weosende gesawe. Wæs he se foresprecena cyning Rædwald æðelre gebyrde, þeah þe he on dæde unæðele wære : wæs he Tyteles sunu ; þæs fæder wæs Wuffa haten, from þæm Eastengla cyningas forðon Wuffingas wæron nemnde.